По 17 години кандидатски статус Република Северна Македонија денеска на 19 јули 2022 година во Брисел ги започнува преговорите за полноправно членство во Европската Унија, објави утрово Владата.
Започнувањето на преговорите ќе биде означено со одржување на првата меѓувладина конференција закажана за во 9:30 часот во Советот на ЕУ, на која како предводник на македонската делегација ќе говори шефот на Владата Димитар Ковачевски.
Веднаш по меѓувладината конференција е планирана и прес-конференција во 11:00 на Ковачевски и владиниот тим.
Според агендата денеска пред одржувањето на меѓувладината конференција, Ковачевски и албанскиот премиер Еди Рама ќе се сретнат со претседателката на Европската Комисија Урсула фон дер Лајен и премиерот на Чешка, Петр Фиала како претставник од чешкото претседателство.
Во рамките на историската посета на Брисел за денеска попладне е најавено и започнувањето на скринингот за Македонија и работен ручек на Ковачевски со еврокомесарот за проширување и добрососедски политики Оливер Вархеји, на кој ќе присуствуваат и двете делегации.
Како дел од официјалната владина делегација во Брисел отпатуваа и Артан Груби, Бојан Маричиќ, Бујар Османи, Оливер Спасовски, Бисера Костадиновска-Стојчевска, Адмирим Алити и други високи претставници на Владата кои се придружувани од амбасадорката Агнеза Руси Поповска, шеф на Мисијата при ЕУ. (С.К.)