Осум од десет верници избрале да останат дома за Велигден и за Рамазан Бајрам, покажува истражувањето на јавното мислење „практикување на религија во услови на пандемија“, реализирано од интернет порталот religija.mk и Институтот за политички истражувања – Скопје со поддршка на фондацијата „Конрад Аденауер“.
Според истражувањето, 80,3 отсто од испитаниците сметаат дека Велигден и Рамазан Бајрам треба да се слават во домашна атмосфера, наспроти 10,4 отсто кои сметаат дека овие празници треба да се слават во црквите и во џамиите.
Околу 75 отсто од анкетираните сметаат дека МПЦ-ОА и ИВЗ исправно постапиле што се приклучиле на вонредните мерки на државата, додека пак 79,6 отсто од испитаниците сметаат дека забраната за масовна посета на црквите и џамиите е соодветна и оправдана превенција од ширење на корона вирусот. Половина, пак, одговориле потврдно дека верските заедници соодветно реагираат на предизвиците со корона вирусот.
Според истражувањето, 63,4 отсто од анкетираните рекле дека вонредните мерки за заштита и забраните за присуство на верници во храмовите не значи и ограничување на правото на вероисповед.
На прашањето „Дали сметате дека ако отидете во црква или џамија, постои ризик да се заразите од корона вирус?“, речиси повеќе од половината или 57,1 отсто од анкетираните одговориле потврдно, а само 20,9 отсто рекле дека немаат страв од тоа.
Истражувањето покажува дека стравот од коронавирусот кај граѓаните е голем, а од тие причини речиси седум од десет испитаници рекле дека од почетокот на пандемијата немаат отидено во црква или џамија, токму поради страв да заразата. Во тој страв ако им е потребна помош повеќе од половината, или 58,7 отсто од испитаниците, помош би побарале од психолог, наспроти 11,9 отсто кои за психолошка помош би се обратиле кај својот свештеник.
Истражувањето на ИПИС и religija.mk е направено со поддршка на КАС (Конрад Аденауер) и дел е од серијалот истражувања на јавното мислење за перцепцијата на граѓаните во мултиконфесионални општества. Истражувањето е спроведено во април оваа година на репрезентативен примерок од 1.127 испитаници со маргинална грешка е помеѓу 2,9 проценти и со 95 проценти интервал на веродостојност.