Европскиот комесар за одбрана Андриус Кубилиус денеска повика на итна изградба на „ѕид против дронови“ долж источното крило на Европската унија, откако руски дронови утрово влегоа во полскиот воздушен простор.
Русија уште еднаш ги тестира пограничните држави, ЕУ и НАТО. Ќе соработуваме со земјите членки, пограничните земји и Украина. Русија ќе биде запрена, порача тој на Х.
Портпаролката на НАТО, Алисон Харт, изјави дека денеска на редовната седница ќе се разговара за одговорот на Алијансата на упадот на руските дронови во полскиот воздушен простор, како и дека претставници на НАТО се во контакт со Полска.
Харт, во објава на Х, истакна дека генералниот секретар на НАТО, Марк Руте, е во контакт со полските државни власти.
Високата претставничка на ЕУ за надворешна политика и безбедност, Каја Калас, исто така рече дека прелиминарниот извештај укажува на тоа дека рускиот упад бил намерен, како и дека е во контакт со НАТО и Полска.