Итна средба на министрите за здравство на седумте најразвиени земји во светот треба да се одржи денеска, пренесуваат медиумите во регионот.
Состанокот го свика Велика Британија која заседава со Г7 и која е меѓу се поголемиот број земји во кои се откриени случаи на новата варијанта на ковид-19, Омикрон, која содржи бројни мутации.
Европскиот центар за превенција и контрола на болести предупреди дека новиот вид е поотпорен на вакцините и се шири побрзо, а претседателката на Европската комисија, Урсула фон дер Лајен, изјави дека на производителите на вакцини им требаат две до три недели „ да добијат потполна слика за тоа колку е опасна новата мутација на коронавирус“.
– Знаеме дека сега сме во трка со времето, рече Вон дер Лајен.
Таа ги повика производителите на вакцини да ги адаптираат вакцините на новиот сој Омикрон во рок од 100 дена.
Заложбата за адаптација на вакцината е дел од третиот договор со Фајзер, со кој ЕК најави уште 1,8 милијарди дози од вакцината.
Заразата со новиот сој веќе е потврдена во неколку европски земји, a брзото ширење на новиот сој на коронавирусот принуди голем број на држави да ги вратат на сила ограничувањата.
Израел веќе забрани влез за странци, а Мароко, Филипини и Јапонија исто така се решија да ја преземат оваа мерка.
– Ќе забраниме секаков прием на странски државјани од целиот свет од 30 ноември. Го правиме овој чекор од претпазливост, за да се спречи најлошото сценарио во Јапонија, изјави Фумио Кишида, премиер на Јапонија.
Властите во Јужна африка пак размислуваат за задолжителна вакцинација против коронавирусот за лицата кои работат на одредени позиции.
– Доколку бројот на заразени продолжи да расте, четвртиот бран може да го очекуваме во следните неколку недели, ако не и порано. Анализираме да ги направиме вакцините задолжителни за работниците, луѓето кои сакаат да одат на јавни настани, јавен превоз и некои други места, изјави Сирил Рамафоса, претседател на Јужноафриканска Република.