Судскиот совет на денешната седница гласаше за судијата Иван Џолев да биде новиот претседател на Основниот суд Скопје 1.

Џолев ја доби поддршката од 11 членови на Советот од вкупно 13. Двајца гласаа против. Исто така судијата Џолев ја доби поддршкатта од 6.членови кои како малцинство гласаат според Бадентеровиот систем.

По оставката на претходниот претседател на Основниот суд Скопје 1, Стојанче Рибарев, поднесена на 25.октомври годинава, на огласот се пријавиле осум кандидати, а на утврдената ранг листа како предлози за гласање според бодовната листа прв беше Владимир Панчевски потоа Ивица Стефановски, па Верка Петковска, Оља Ристова, Осман Шабани, Ѓоко Ристов, Џолев па Весна Димишкова.

Претседателот на Советот, Зоран Караџовски за време на седницата информираше дека Оља Ристова ја повлекла кандидатурата, по што започна гласањето за останатите од ранг листата.

ГЛАСОВИТЕ ЗА КАНДИДАТИТЕ ЗА ПРЕТСЕДАТЕЛ:

Резултатите по гласањето беа: Владимир Панчевски 5 ЗА, 8 ПРОТИВ, Ивица Стефановски 7 ЗА, 6 ПРОТИВ, Верка Петковска 5 ЗА, 8 ПРОТИВ, Осман Шанаби 6 ЗА, 7 ПРОТИВ, Шорѓи Ристов 8 ЗА, 5 ПРОТИВ и за Џолев гласаа 11 ЗА, 2 ПРОТИВ и 6 ЗА 0 ПРОТИВ според Бадентер.

Непосредно пред гласањето членовите најавија дека бодовите овој пат нема да играат улога во нивното убедување за нов член на Единицата, бидејќи таму бил потребен човек кој ќе воспостави ред и кој ќе има организациски способности пред се, бидејќи Основниот суд Скопје 1 изминатиов период, според нив, ја давал сликата за целото судство, што наговестуваше дека Панчевски иако е прв на листата, ја немаше улогата на фаворит.

Комисијата која ја утврди листата и која ги интервјуирала кандидатите, рече дека Иван Џолев има 9 години судиско искуство, што е речиси исто како и кај другите кандидати.

По изборот на Џолев претседателот на Судскиот совет, Зоран Караџовски, не излезе да даде изјава за медиумите.

Џолев, инаку, во ноември минатата година поднесе кривична пријава против Панчевски, кој тогаш беше претседателот на Кривичен, поради кривично дело поврзано со влијание врз судија за да преземе одделни незаконити дејствија.

Џолев тогаш за НОВА изјави: “Единствено ќе речам дека го тужам за влијание врз судот за што е предвидена казна затвор од 1 до 5 години”.

Панчевски уште истиот месец му поднесе пријава на Џолев за лажно пријавување.

Џолев во февруари годинава поднесе кривична пријава против Јордан Лазаров, претседател на комисијата во Советот за утврдување на факти кој одлучуваше за претставката што ја поднесе Антиикорупциската комисија, а се однесува на настан случен во 2014 за работењето на Џолев како судија во Кривичниот суд.

Кривичната пријава против Лазаров е за злоупотреба на службената положба. Џолев и неговиот адвокат Стеван Павлески сметаа дека претставката против Џолев се разгледува токму во овој период за да му наштети на неговата кандидатура за претседател на Основниот суд Скопје 1.