Судијата Иван Џолев денеска преку соопштение, кое го објави Фокус http://fokus.mk/sudijata-ivan-dholev-go-tuzhi-pretsedatelot-na-krivichniot-sud-vladimir-panchevski/, најави дека ќе поднесе кривична пријава против судија во Кривичниот суд поради кривично дело поврзано со влијание врз судија за да преземе одделни незаконити дејствија.
Фокус објави дека судијата против кој Џолев ја поднесува кривичната пријава е Владимир Панчевски, претседател на Кривичниот суд.
Во соопштението на Џолев се вели дека поради сензитивноста на ситуацијата, нема да го открие идентитетот на судијата, ниту пак ќе ги каже неговите иницијали.
„Денес настапувам како граѓанин, индивидуа, како судија на Кривичниот суд кој се залага за владеење на правото и правната држава, а во смисла на чл.103 од Судскиот деловник. Верувам дека Јавното Обвинителство сериозно ќе ја разгледа кривичната пријава и во најбрз можен рок ќе преземе процесни дејствија во врска пријавата. Верувам и во судството и во Кривичниот суд, во моите колеги и верувам дека овој преседан односно исклучок само ќе потврди дека судиите во овој суд судат согласно законите и се залагаат за владеење на правото“, пишува во соопштението на Џолев.
НОВА разговараше телефонски со судијата Џолев кој единствено рече дека нема да го открие името на судијата, но не ги негираше ниту потврдуваше информациите дека тоа е токму Панчевски.
“Единствено ќе речам дека го тужам за влијание врз судот за што е предвидена казна затвор од 1 до 5 години”, рече тој.
Го контактиравме и претседателот на судот кој е зачуден што се споменува неговото име бидејќи тој уверува дека работи законски и професионално.
“Ќе давам коментари кога ќе ја видам кривичната пријава ако е против мене”, вели Панчевски за НОВАТВ.
Инаку Џолев ја водеше истражната постапка против претседателот на советот на Општина Центар, Мирослав Шиповиќ и беше на списокот на Панчевски за прераспределба на судии од Кривичниот суд во одделот за прекршоци.