Судскиот совет на својата веб-страна потврди дека ВД Претседателот на Основен суд Скопје 1 Скопје, Стојанче Рибарев на 20.октомври до Судскиот совет на Република Македонија доставил писмено известување дека од истиот ден се наоѓа на отворено боледување и дека негова замена ќе биде судијата Диана Груевска Илиевска.

Пет дена подоцна Рибарев доставил до Судскиот совет писмено известување дека поднесува оставка од функцијата ВД Претседател на Основен суд Скопје 1 и по неговото разрешување да продолжи да ја извршува функцијата судија на Врховниот суд на Република Македонија.

Рибарев навел дека причините за поднесувањето на оставката се од лична природа.

Судскиот совет соопштува дека по двете писмени известувања, во најкраток можен рок ќе закаже и одржи седница на која ќе одлучува за наследникот на Рибарев.

Боледувањето на досегашниот прв човек на Кривичниот суд доаѓа непосредно откако беше сослушан од Специјалното јавно обвинителство кое води предистражна постапка дали бил злоупотребен АКМИС – системот за електронско распоредување на судските предмети и дали Владимир Панчевски, екс-претседателот на Кривичен, издавал информации за судски случаи.