Претседателот на Република Македонија, д-р Ѓорге Иванов, со особено внимание ги следи настаните и развојот на состојбите во пријателска Република Турција и е во постојан  контакт со сите безбедносни институции во Македонија, јави неговиот кабинет.

“По добивањето на податоците за намерите на вршење на воен пуч во Република Турција, Армијата на Република Македонија презема низа мерки и активности за заштита на државната граница.

Информираме дека во моментов се одржува состанок на групата за проценка за анализа на безбедносната состојба.

Република Македонија ja поддржува демократски избраната влада на Република Турција”, вели соопштението.

И додава дека Турција e голем пријател и стратешки партнер на Македонија а Иванов поддржува нормализирање на ситуацијата:

“Претседателот Иванов го поддржува нормализирањето на состојбите во Република Турцијa и повикува на почитување на демократските институции и избегнување на секаков вид на насилство и крвопролевање.

Претседателот Иванов смета дека мирот и стабилноста е од клучно значење за секоја од државите во регионот, и во овие моменти е потребна разумност и смиреност.‎ Македонскиот претседател порачува дека политичките цели треба да се постигнуваат единствено со дијалог и во согласност со волјата на граѓаните на избори”, се вели во соопштението од кабинетот на Иванов.