Претседателот Ѓорге Иванов во интервју за унгарската национална телевизија изјави дека палењето на Народната канцеларија била една од „насилните акции“ за кои се користеле пари од фондации кои го носат името Сорос.

-Видовме дека средства од американските државјани, од даночните обврзници на САД, се префрлани во фондацијата која го носи името на Сорос и се користеле дури и за насилни акции. Една од нив беше и палењето на Народната канцеларија. И без грижа на совест тие тврдат дека тоа било протест, односно начин на делување на таквите организации, изјави Иванов, на прашањето за улогата на Сорос во Македонија.

Тој посочува дека за улогата на милијардерот се отвораат постапки во САД, за како што вели да се утврди „бил моделот на работа и соработка и во други земји за кои сега има реакции“.

На прашањето за директното вмешување во политиката на одредени невладини организации, Иванов вели дека Република Македонија е жртва на „октроирано цивилно општество кое го октроираат странски цивилни фондации и кои ги креираат активностите на невладините актери, не според интересите и потребите на граѓаните“.

Притоа, тој прави поделба дека „има многу невладини организации кои навистина ги отвораат прашањата, проблемите и предизвиците со кое се соочува населението“ и „од нив имаат корист и населението и Владата и сите,  затоа што се совест на општеството, и укажуваат што и како треба да се прави“.

Дугите, според него „едноставно се во функција на манипулација, притисок и отворање прашања кои не се од интерес на нашите граѓани“.

Според Иванов најголем проблем на Македонија е што странските фондации го етнизирале цивилното општество и го поделиле населението по етничка основа, и притоа, тој заговара регулирање на оваа како што вели „премногу либерална“ област.

– Да се знае кој дава пари, од каде доаѓаат тие пари, која е целта на тие големи милионски суми кои влегуваат без никој да ги контролира и едноставно да создаваат проблеми кои што не можат толку брзо да се совладаат, вели Иванов за унгарската телевизија.