Во Хрватска стапи на сила изборниот молк во пресрет на утрешните претседателски избори на кои 3,85 милиони граѓани со право на глас ќе одлучуваат кој од 11-те кандидати ќе ја предводи државата во наредните пет години.
Речиси сите анкети како водечки кандидати ги издвојуваат актуелната претседателка Колинда Грабар Китаровиќ, поддржана од владејачката ХДЗ, Зоран Милановиќ, кандидат на СДП и независниот кандидат Мирослав Шкоро.
Хрватската радиотелевизија (ХРТ), според најновата анкета, објави дека во вториот круг ќе се натпреваруваат сегашната претседателка Грабар Китаровиќ со освоени 28,3 отсто од гласовите и поранешниот хрватски премиер, социјалдемократот Зоран Милановиќ со поддршка од 26,6 проценти.
Според анкетата, во случај Шкоро да помине во втор круг, би ја победил актуелната шефица на државата со разлика од 3,6 отсто од гласовите (Шкоро 48,7 проценти, а Гранар Китаровиќ 45,1 отсто). Ако, пак, трката се сведе на Шкоро и Зоран Милановиќ, победа би однел независниот кандидат со 5,6 отсто гласови.
Од вкупно 11 кандидати кои ќе учествуваат на изборите, само уште европратеникот и поранешен судија на Стопанскиот суд во Загреб, Мислав Колакушиќ би освоил околу седум отсто, а сите останати се под три проценти.
Избирачките места ќе бидат отворени утре во 7 часот, а ќе се затворат во 19 часот, додека првите прелиминарни резултати се очекуваат околу 20 часот. Работата на изборните тела на претседателските избори ќе ја следат рекордни 24.000 набљудувачи.