Завршија десеттите парламентарни избори во Македонија, петти предвремени по осамостојувањето. На ред е пребројувањето на гласовите, првични резултати и, секако, први реакции од учесниците во изборниот процес што овојпат се одвиваше под специфични околности поради пандемијата на Ковид-19. Излезноста до 19 часот, според податоци на Државната Изборна Комисија (ДИК), беше 45,77 отсто или правото на глас до тој момент го искористиле 830.370 граѓани. Колку се поместени бројките во последните два часа од изборите, јавноста ќе биде известена од прес-конференцијата на ДИК што е најавена наскоро.
Право на глас имаа 1.814.613 милион граѓани кои гласаа на 3.480 избирачки места. Овој процес се издвојува од досегашните во земјата, бидејќи се организира во состојба на пандемија со Ковид-19, гласањето за различни категории на лица е три дена, а денешниот изборен ден ќе трае два часа повеќе од вообичаеното и прогласен е за неработен.
Избирачките места во шесте изборни единици требаше да се отвораат во 7 часот, а гласањето ќе заврши во 21 часот. Се гласа за 15 политички партии и коалиции кои вкупно имат 1.578 кандидати меѓу кои, според статистиката на ДИК, има 675 жени (42,78 отсто) и 903 мажи (57,22 отсто).
Вчера гласаа болните, немоќните и хронично болните лица, затворениците, лицата во домашен притвор и во старечките домови. Според податоците од ДИК, правото на глас вчера го оствариле вкупно 7.861 болни и немоќни лица. Што се однесува, пак, до лицата кои се наоѓаат во старечките домови, од вкупно 357 пријавени избирачи во оваа категорија, гласале 234, а во казнено-поправните установи 1.235 лица.
Гласањето за овие избори почна во понеделникот, ден што беше резервиран за заболените лица со Ковид-19 и оние во самоизолација, при што правото на глас го искористиле 723 од нив. Од гласањето во понеделникот и од вчера, ДИК не објави резултати, туку само бројка на излезност. Ливчињата останаа запечатени во пликоата кои се наоѓаа во гласачките кутии до вечерва кога ќе се пребројуваат со сите останати.