Втор ден од гласањето за предвремените парламентарни избори. По вчерашното изјаснување на инфицираните од Ковид-19 во (само)изолација, на ред се болните и хронично болни граѓани, изнемоштените, затворениците, лицата во домашен притвор, во старечки домови и шестмина внатрешно раселени лица.
Според последните податоци на Државната изборна комисија (ДИК) објавени на нивната веб-страна, денеска треба да гласаат 8.855 болни, немоќни и хронично болни чии пријави се прифатени од ОИК. Најмногу болни и немоќни за гласање се пријавени во Прилеп и во Кичево по 486 граѓани, потоа во Струмица – 465, во Ново Село – 375, во Крива Паланка – 361, во Делчево – 335 и во Липково – 331. Гласање за болни и немоќни нема да има во Вевчани, а во Желино е прифатено барањето на само едно лице, додека во Шуто Оризари и во Центар Жупа ќе гласаат по четири болни и немоќни лица. Во Арачиново се пријавени петмина за гласање денеска.
Од скопските општини во Гази Баба се прифатени барањата за гласање на 168 болни и немоќни граѓани, во Бутел – 82, во Карпош – 80, во Кисела Вода – 57, во Ѓорче Петров – 48, а во Аеродром – 47.
Гласање ќе се спроведува и во 13. Казнено-поправни установи, а во посебните изводи од Избирачкиот список се запишани 1.657 гласачи, како и пријавени лица во домашен притвор. Гласање ќе има и во 17 старечки домови каде правото на глас ќе можат да го остварат 357 гласачи.
Гласањето на овие лица се спроведува од страна на избирачките одбори, како и вообичаено досега, со тоа што и членовите на одборите, но и лицата што се пријавиле да гласаат задолжително мора да ги почитуваат општите превентивни мерки за заштита од Ковид-19.
Врз основа на Упатството на ДИК, членовите на Избирачкиот одбор и претставниците на политичките партии кои го спроведуваат гласањето во домот на болните, немоќните или хронично болните лица мора да носат заштитна маска преку нос и уста и ракавици за еднократна употреба, задолжително е одржување на физичка дистанца во текот на целиот процес, како и миење на раце и дезинфекција по завршување на процесот.
Вчера, на првиот ден на гласањето, за кандидатските листи се изјаснуваа лицата со Ковид-19 и во самоизолација. Државната изборна комисија синоќа соопшти дека правото на глас го искористиле 723 лица заболени од Ковид-19 и во самоизолација.
Претседателот на ДИК, Оливер Дерковски појасни дека било утврдено оти треба да гласаат 759 лица, а разликата што се јавува во бројките што ги соопштија претходно во текот на вчерашниот ден е од причина што тие одлучувале и прифатиле одредени приговори од граѓани.
Од вчерашното и денешното гласање, ДИК не објавува резултати, туку само бројка на излезност. Ливчињата остануваат запечатени во пликоата кои се наоѓаат во гласачките кутии до денот на изборите, односно до завршување на гласањето.
Право на глас на овие десетти парламентарни, петти предвремени, избори имаат 1.814.263 милион избирачи.