По два месеца пауза, Србија ја враќа мерката „полициски час“ која засега е најавена за Белград каде ситуацијата со Ковид-19 во земјата е најалармантна. Како што истакна претседателот Александар Вучиќ, „полициски час“ ќе стапи на сила во петок, веројатно во 18 часот и ќе трае до 5 часот наутро во понеделник.
Од утре, пак, како што порача Вучиќ, во главниот град стапува на сила и забраната за јавни собири на отворен или во затворен простор со повеќе од пет лица.
„А, од петок одиме на подолг полициски час, до понеделник. За натаму ќе видиме. Ќе обезбедиме движење на сопствените на домашни миленичиња, за мајките со деца и, секако, за пензионерите“, порача Вучиќ.
Србија во моментот, според Вучиќ, има речиси 4.000 хоспитализирани пациенти кои се позитивни или суспектни на Ковид-19. На вечерашната прес-конференција, тој алармира дека и капацитетите на болниците се полни, дека места од ден на ден има се помалку и апелира на придржување на мерките за заштита од коронавирусот.
„Сите болници во Белград се речиси полни. Инфективната клиника, Клиничкиот центар „Бежаниска коса“, „Драгиша Мишовиќ, Клиничкиот центар Земун, Воената болница на Карабурма. Значи сите болници што ги одредивме како Ковид центри се полни, а се полни и Ортопедската болница на Бањица во која веќе се сместени над 70 лица и секој ден пристигнуваат по 10-20 нови. Луѓе, мора да се чуваме, мора да ги чуваме животите. Бесот насочете го кон мене, не кон лекатите. Тие на 35 степени се облечени во скафандери, одат во црвената зона и се борат за нашите животи“, рече Вучиќ.