Во повеќето косовски општини ќе мора да се одржи втор круг, откако ниту една партија не успеа да доминира во првиот круг локални избори кој се одржа вчера.

Косовската невладина организација „Демократија на дело“ соопшти синоќа дека според првичните резултати, победник на локалните избори е Демократскиот сојуз на Косово со 210 илјади гласови.

На второ место е Демократската партија на Косово со 140 илјади, додека на трето е движењето Самоопределување со 130 илјади гласови. Партијата на премиерот Рамуш Харадинај доби 100 илјади гласови.

Српската листа прогласи победа во сите општини на Косово каде има мнозинство српско население, во северна Митровица, Лепосавиќ, Звечане, Зубин Поток, Грачаница.

Најголем удар претрпе Самоопредулавање кое на парламентарните избори победи. На локалните избори се гласаше за градоначалници и советници во 38 општини.

Одѕивот бил 43,85 насто. Вториот круг е за еден месец.

Изборите се сметаа за прв тест за новата Влада предводена од Рамуш Харадинај.

Во трката за Приштина, градоначалникот Шпенд Ахмети, кој доаѓа од партијата Самоопределување, не успеа да победи во првиот круг откако се соочи со силен предизвикувач од Демократската лига на Косово (ЛДК), Арбан Абраши. Ахмети освои 44 проценти од гласовите, недоволно за победа уште во првиот круг, а Абраши има 35,7 проценти.

Самоопределување има кандидати во вториот круг и во Призрен и Гњилане, каде повторно ќе има соочување меѓу Самоопределување и ЛДК. Трите владејачките партии од таканаречената „воена коалиција“ имаат кандидати во вториот круг во Призрен, Пеќ, Митровица и Ѓаковица.

Пред изборите, двајца активисти на српски партии беа притворени, а на денот на изборите косовската полиција запре камион во кој имало експлозив и неколку гранати додека влегувал од Србија во Косово. Три лица беа уапсени.