Кристијано Роналдо, сепак, ќе допатува во Скопје и ќе биде во комбинација за настап за Реал Мадрид против Манчестер јунајтед во утрешниот УЕФА Суперкуп спектакл на „Телеком арена“. Веста дека на списокот патници за Македонија се наоѓа и Португалецот наиде на задоволство кај фановите на „кралскиот“ клуб, но беше изненадувачка за највлијателните шпански медиуми со оглед на подолгиот одмор што фудбалската ѕвезда го доби по Купот на конфедерации во Русија.
Весникот „Марка“ го поткрепува присуството на Роналдо во тимот со одличната кондиција во која се наоѓа по напорната индивидуална работа во слободното време. Авторот на текстот притоа нагласува дека тренерот Зинедин Зидан во Скопје ќе смета на сиот расположлив арсенал со кој го покори континентот во минатата сезона, а во експедицијата го вклучил и неговиот син Лука кој ќе биде трет голман на Реал утревечер.