Соочување со одговорните за неуспешниот воен удар во Турција да, но почитувајќи го владеењето на правото.
Ваква порака денеска му упати Генералниот секретар на Советот на Европа, Торбјорн Јагланд на турскиот државен врв по пристигнувањето во Анкара.
На заедничката прес-конференција со турскиот министер за надворешни работи Мевлут Чавушоглу, Јагланд посочи дека обидот за државен удар во Турција бил “безобразен“, но против него имало импресивен отпор од страна на турскиот народ.
За пучот кој се одвиваше во јули, претседателот Реџеп Таип Ердоган го обвини муслиманскиот свештеник Фетхулах Ѓулен како главен организатор.
Проповедникот Ѓулен пак, кој живее во САД од 1999 година ги негира обвинувањата.
Турскиот министер за надворешни работи Чавушоглу изјави дека посетата на Јагланд е многу важна за Анкара и дека ќе имаат можност да ги обелоденат сите прашања во врска со спречениот обид за државен удар.
Предвидено е генералниот секретар на Советот на Европа да се сретне и со претседателот на Турција Реџеп Таип Ердоган, премиерот Бинали Јилдирим, министри и со лидери на опозициски партии.