Eврокомесарот за проширување Јохaнес Хан попладнево допатува во Приштина на средба со косовскиот претседател Хашим Тачи.
За време на средбата Тачи изјавил дека е неприфатливо доцнењето што му се прави на Косово во процесот за визна либерализација, информира дописникот на МИА.
„ Стравувам дека некој во ЕУ лошо го измешал процесот за визна либерализација со процесот за членство на Косово во ЕУ. Не заборавете дека Косово не станува членка на ЕУ во моментот кога ќе се укинат визите“ изјавил Тачи на средбата со еврокомесарот Хан.
Според Тачи, одложувањето на визната либерализација и на појаснувањето на европскиот пат на Косово и на Балканот, создава простор за други сили да го дестабилизираат регионот.
Тој му заблагодари на Хан за неговото доаѓање во Косово, веднаш по објавувањето на извештајот за напредок.
Хан оцени дека извештајот реално го отсликува напредокот што го направи Косово.
Еврокомесарот Хан оствари средба и со спикерот на косовскиот Парламент, Кадри Весели, кој изјави дека Косово максимално работи заедно со своите партнери во унапредување на европските реформи за зајакнување на правната држава и борбата против корупцијата и организираниот криминал.
Оценувајќи ја како неправедна, како што оцени, изолацијата која продолжува да им се прави на граѓаните на Косово, Весели нагласи дека е неопходно укинување на визите од страна на ЕУ.
Според Хан, неговата посета на Приштина ја потврдува одлучноста на ЕУ за поддршка на Косово.
Официјален Брисел, додаде Хан, е отворен за тесна соработка со косовските институции и очекува официјална Приштина да ги исполни сите барани критериуми за визна либрализација.