Поранешниот министер за транспорт и врски, Миле Јанакиески, тврди дека кривичната пријава за злоупотреба на службената положба е поднесена со цел тој лично да се дискредитира и да се оттргне вниманието на јавноста за нереализирањето на ниту еден проект во општина Прилеп од страна на Владата на Зоран Заев.
Тој додава дека поднесената кривична пријава од СВР Прилеп веќе еднаш била поднесена до Јавното обвинителство и таа била отфрлена како неоснована.
„Имено, продажбата на овие 2 стана како и останатите станови во државна сопственост е извршено согласно важечките законски и подзаконски акти. Имено ова право на Министерот за транспорт и врски е определено согласно Закон за продажба на станови во општествена сопственост, Одлука за продажба на станови кои, права должности и одговорности во поглед на располагањето има Република Македонија ( Службен весник бр. 68/92 и 62/03) донесена согласно член 2 од горенаведениот Закон и Решение за овластување за потписник за склучување на договори за купопродажба на станови од 24.10.2006 година“, вели во писмената изјава Миле Јанакиески.
Екс министерот заедно со изјавата до јавноста испрати и фотокопија од „Службен весник“, каде е објавена одлука за продажба на станови во државна сопственост.
СВР Прилеп кривичната пријава против Миле Јанакиески и уште три лица ја поднесе за злоупотреба на службената положба.
Според пријавата Јанакиески во периодот од 2007 до 2010 година без одлука на Владата која била сопственик на станови во т.н. пензионерска зграда во Прилеп, склучил договор за купопродажба на два стана со лицата кои биле корисници на становите.
Според извори од истрагата, второпријавениот бил нотар, третиот осомничен поранешен државен правобранител, Стеван Трајкоски, а четврта е актуелната државна правобранителка, Валентина Јорданоска, кои имале задача да ја испитаат законитоста за склучување на договорите, но не преземале мерки за заштита на државниот имот. На тој начин овозможиле да бидат откупени становите по повластени цени и го оштетиле државниот буџет за 42.000 евра.