Published: Thursday, December 9, 2021 15:33
Градоначалничката Данела Арсовска преку претседавачот Трајко Славески закажа седница на Советот, без при тоа благовремено да ги покани медиумите, кои редовно ја следат работата на Советот, реагира Љубица Јанчева, координаторка на советничката група на СДСМ во Советот на Град Скопје.
– Ваквиот потег на Данела е невиден преседан во досегашната работа на Советот чии седници секогаш биле достапни за јавноста преку медиумите. Ова бегање од јавноста е непочитување на медиумите, но и на граѓаните чии претставници се советниците. Ако сака да сокрие Данела нешто нема да може – вели Јанчева.
Според неа, уште во првите месеци од мандатот, Арсовска покажува непочитување кон јавноста и непознавање на надлежностите на Градот.
– Доказ за тоа е и сообраќајниот метеж во градот, кој се случи поради затајување на работата на Центарот за управување и контрола на сообраќајот, што е под надлежност на Град Скопје. Ова е срамно, неодговорно однесување кое скопјани не го заслужуваат. На денешната седница како точка на дневен ред не беше ставена донацијата, односно бесплатното украсување на градот. Данела Арсовска и Трајко Славевски треба да знаат дека секоја донација до Градот, мора да мине со одлука на Советот, ниту градоначалничката ниту кој било друг нема право самостојно да одлучува по однос на донации – додаде Јанчева.
Таа рече дека е добро тоа што се зголеми износот на средствата за помош на семејствата на настраданите во несреќата во Бугарија.
– Новата администрација предводена од Арсовска, во сред пандемија не успеа ниту да донесе соодветни протоколи за работа на Советот, па затоа принудени сме оваа изјава да ја даваме пред бараките на Град Скопје. Неодговорно, несериозно и нечесно работење, тоа е одликата на првиот месец од работата на Арсовска – вели Јанчева.