Податоците од црните кутии на „Боинг 737 Макс 8“ на „Етиопијан Ерлајнс“ што се урна во близина на Адис Абеба упатуваат на „јасна сличност” со падот на авионот од ист модел на „Лајон Ер“ во октомври во Индонезија, соопшти етиопската министерка за транспорт, Дагмавит Могес.

„Црната кутија за снимање на параметрите на летот покажа „јасни сличности” меѓу несреќите на двата авиона од истиот модел“, рече Могес на прес-конференција и истакна дека „црните кутии“ се во добра состојба.

Прелиминарниот извештај за причините за несреќата ќе биде објавен во рок од 30 дена, додаде министерката за транспорт на Етиопија.

Сите 157 патници загинаа во падот на авионот на „Етиопијан Ерлајнс“ што леташе на релација Адис Абеба – Најроби, а се урна по шест минути од полетувањето на 10 март.

Безбедносната анализа на новиот систем за контрола на лет имплементиран од Боинг во моделот „737 Макс 8“ покажа неколку клучни пропусти, објави американскиот весник „Сиетл Тајмс“.

Како што се објаснува, цитирајќи актуелни и поранешни инженери во американската федерална администрација за воздухопловство, безбедносната анализа на системот за контрола на лет, наречена Систем за проширување на карактеристиките на маневрирање, ја потцениле моќта на тој систем.