Подобрување на работните услови за новинарите, ослободување на медиумите од владините реклами, поголема транспарентност и доведување на јавниот сервис да функционира во нормална состојба и да функционира како вистински граѓански сервис, побараа денеска новинарите и граѓанските организации од министрите за администрација и транспарентност Дамјан Манчевски и Роберт Поповски на дебата организирана за Реформите во медиумите.
Претседателката на Самостојниот синдикат на новинари, Тамара Чаусидис рече дека очекува во приоритетите на новата влада да биде подобрувањето на условите во кои работат новинарите. Исто така таа рече дека очекува новата влада да ги укине таксите за Централен регистар, за Катастар, како и да се скрати рокот за добивање на информации по слободен пристап. Таа рече дека ја поразува тоа што Законот за работни односи не е во итните приоритети на владата и дека самоцензурата е приткаена во медиумите и тоа нема само од себе да се смени.
Насер Селмани, претседател на здружението на новинари на Македонија рече дека во ребалансот на буџетот се предвидени премалку пари за јавниот сервис и побара посебна дебата да се одржи за финансирањето и функционирањето на јавниот сервис.
Сопственикот и уредник на интернет-порталот, МКД.мк, Александар Дамовски побара да се воведат фер и еднакви услови за сите медиуми вклучувајќи ги и порталите за кои со години се води расправа дали треба или не треба да се ставаат во категоријата медиуми.
Министерот за администрација, Дамјан Манчевски рече дека новата влада сака да направи реформи во медиумите кои ќе бидат резултат од предлози на сите засегнати страни.
Министерот без ресор задолжен за транспарентност и отчетност рече медиумите мора да бидат ослободени од секаков притисок. Исто така рече дека прв чекор кон тоа е вистински, реален јавен-граѓански сервис.