Законот за јавно обвинителство денеска влегува во собраниска процедура. Ќе се бара приближување на ставовите на власта и опозицијата на јавна расправа во рамки на парламентарната Комисија за политички систем. Седницата на собраниската Комисија за политички систем и односи меѓу заедниците е закажана во 14 часот и единствена точка на дневен ред е „Јавното обвинителство како ефикасен орган во борба против корупцијата“.
Од СДСМ, во пресрет на јавната собраниска дебата, порачуваат дека Законот за ЈО е последна шанса за ВМРО ДПМНЕ да покаже дали е за ЕУ и за правна држава.
„Сите демократски капацитети во државата и нашите стратешки меѓународни сојузници го поддржуваат законското решение за Јавното обвинителство кое обезбедува независност и професионалност на јавните обвинителства. Законот за Јавно обвинителство е последната шанса на ВМРО-ДПМНЕ да покаже дали навистина е за ЕУ и за неселективно владеење на правото. Јавната собраниска дебата за Законот е последна можност за ВМРО-ДПМНЕ да покаже дека навистина се грижи за владеење на правото, за стручни, ефикасни и независни обвинители и за процесуирање на сите кривични дела поврзани со висока корупција“, соопшти СДСМ.
На јавната расправа, покрај политичките претставници, ќе учествуваат и домашни и странски експерти, како и државниот јавен обвинител, Љубомир Јовески, на што инсистираше опозициската ВМРО-ДПМНЕ на последната средба на партиските работни групи.
Од ВМРО-ДПМНЕ потврдија дека ќе учествуваат на јавната расправа. Лидерот на партијата, Христијан Мицкоски изјави дека се сериозни во намерата да се донесе законот за јавно обвинителство, ако Владата ги прифати забелешките на опозицијата.
„Ако постои реална желба од страна на Владата за прифаќање на забелешките на опозицијата кои се аргументирани, тогаш зошто да не го донесеме тој закон. Но, доколку не постои таа желба, тогаш тоа е тоа“, истакна Мицкоски, додавајќи оти сакаат да се донесе добар закон не само на хартија, туку и да се имплементира во пракса.
Забелешките на ВМРО-ДПМНЕ се дека власта со законот сака повторно да го воскресне СЈО и да ги заштити криминалците од своите редови. Тврдат дека се залагаат за закон кој ќе биде неселективен и пред кој ќе можат да одговараат сите граѓани.
По серијата неуспешни обиди за договор меѓу власта и опозицијата, прашањето за законот за ЈО повторно се актуелизира по неодамнешната посета на еврокомесарот Оливер Вархеи на Скопје, кој порача дека би било добро да се донесе законот пред распуштање на сегашниот парламентарен состав, што би било добар знак за земјите-членки на ЕУ во контекст на очекуваната одлука за отворање на преговори за членство на земјава во Унијата.
И амбасадорите на земјите членки на Европската Унија во земјава на минатонеделната средба со премиерот Оливер Спасовски истакнаа дека носењето на законот за јавно обвинителство, иако не е услов за евроинтеграциите, ќе биде добра порака за определеноста на сите политички субјекти во земјава за дијалог и владеење на правото.