Синдикатот на Клиничкиот центар прифатил линеарно зголемување на платите за сите вработени во јавното здравство од 2806 денари наместо скалестото покачување на платата од 18,4 проценти кое им следуваше согласно Законот за минимална плата по шесте месеци од неговата примена.

Како што соопшти Синдикатот, тие го прифатиле  линеарното зголемување на молба на министерот и заменик министерот за здравство кои им ја предочиле, како што велат, тешката економска состојба.

„Се надеваме дека министерот за здравство ќе го почитува договорот и дека основната нето плата на сите вработени во јавното здравство ќе се зголеми за 2806 денари. Во оваа прилика, сакаме да истакнеме дека планираното покачување на платите во јавното здравство за 5 проценти за Синдикатот на Клинички центар не е прифатливо. Доколку основните плати во јавното здравство во договорениот рок не се покачат за 2806 денари, Синдикатот на Клинички центар ќе бара усогласување на платите и нивно покачување за 18,4 проценти согласно Законот за минимална плата и ќе се бори со сите средства кои му се на располагање тоа да го оствари“, предупредија од здравствениот синдикат.

Синдикатот дополнително посочи и дека доколку не се оствари линеарното зголемување од 2806 денари, ќе дојде и до бран од тужби од вработените за зголемување на платата за 18,4 проценти согласно Законот за минимална плата. (Р.Н.)