Најмалку пет милиони луѓе во Јемен се наоѓаат на раб на глад, а уште 16 милиони ги чека истата судбина, бидејќи хуманитарната криза во земјата излегува од контрола, пишува „Гардијан“. Експертите велат дека ситуацијата во Јемен, земја опустошена од граѓанска војна, „брзо се влошува“, а Светската програма за храна (ВФП) изразува сериозна загриженост за бројот на луѓе кои ќе се соочат со глад во наредните недели и месеци.
Според извршниот директор на WFP, Дејвид Бисли, синџирите на снабдување во земјата се стопирани, а цените на храната „скокаат“.
Со оглед на цените на храната и недостатокот на гориво, тоа е катастрофално. Во моментот, пет милиони луѓе тропаат на вратата на глад, имаме 16 милиони луѓе кои се движат кон глад“, рече Бисли.
Тој на Генералното собрание на ОН, исто така, рече дека без дополнителни средства, организацијата ќе биде принудена да ги намали оброците за 3,2 милиони луѓе до октомври и за уште пет милиони луѓе до декември.
Портпаролката на Светската програма за храна (WFP) за Јемен, Анабел Симингтон, рече дека жителите на Јемен не можат да си дозволат основни резерви на храна.
Причините за кризата со глад во Јемен се сложени, но влијанието врз луѓето во Јемен е јасно. Обезвреднувањето на јеменскиот риал и високите цени на храната им оневозможија на обичните Јеменци да си дозволат основна храна. Потребни се 797 милиони американски долари за да го одржиме сегашното ниво на помош во следните шест месеци, а WFP е во опасност да остане без храна од октомври, рече Симингтон.
Адам Келвик, хуманитарен работник во Јемен, за НВО „Акција за хуманост“, ја опиша ситуацијата како „очајна“. Тој во вторникот ја посети болницата Ал Сабаин во западниот град Сана и рече дека е „полна до врв“ со гладни, неухранети деца.
Мораа да се прошират на други одделенија за да ги примат сите тие деца. Тоа беше ужасна глетка во која креветите беа полни со деца кои личеа на скелети. Јасно се гледа дека ситуацијата брзо се влошува и причината зошто децата се толку тешко потхранети е тоа што нивните мајки се неухранети. Очигледно, тоа значи дека тие не можат да ги дојат своите бебиња и тие завршуваат во оваа ужасна ситуација, опиша тој.
Главната причина зошто храната е толку ретка е конфликтот, а залихите не можат да се транспортираат до области каде има блокади на патиштата и борби, пишува „Гардијан“. Места погодени од најинтензивниот конфликт, како Мариб, ал-Ходеида, Таиз, ал-Дале и Лахи, се меѓу оние на кои им е најпотребна хуманитарна помош.