Уште на самиот почеток на иницијативата „Оpen Balkan“ поканети се да се приклучат Црна Гора, БиХ како и привремените институции на Косово. Иницијативата останува отворена за останатите земји од Западен Балкан , а во нејзината перспективност и добробит не се сомнева ни Светска Банка, вели во интервју за НоваТВ, српската амбасадорка во Република Северна Македонија Невена Јовановиќ , на која ова и е воопшто прво интервју дадено за некој македонски медиум по стапувањето на должноста пред два месеца.
– Што се однесува до отвореноста на иницијативата „Отворен Балкан“ важно е да се нагласи дека повик за придружување уште од самиот почеток им е испратен на Црна Гора и на Босна и Херцеговина, како и на претставниците на Привремените самоуправни институции во Приштина. Зошто тоа до сега не се случи, мислам дека е прашање кое треба да им се постави ним. Ќе потсетам на она што го говореше претседателот Вучиќ за иницијативата„ Отворен Балкан“ а тоа е дека Северна Македонија , Албанија и Србија ќе имаат барем за 1 отсто поголем раст во однос на останатите од Западен Балкан, точно поради учеството во оваа иницијатива а во тоа не се сомнева ни Светска Банка. Исто така, регионот кој е опфатен со оваа иницијатива ќе привлече повеќе од 80 отсто од инвестициите од целиот Западен Балкан. Сето тоа заедно ни зборува дека „Отворен Балкан“ претставува добробит за сите и придонесува за продлабочување на соработката во регионот во сите области. Ако некој тоа не го разбира, ние тука не можеме ништо, заклучува амбасадорката Јовановиќ.