На Игор Југ, еден од осомничените насилниците во Собранието на 27 април му е одреден притвор од осум дена, потврдуваат од Јавното обвинителство. Тој уште вчера е упатен на извршување на определената мерка.
Се работи за притвор што на Југ, кој вчера беша уапсен во Куманово, по пет месеци бегство од органите на прогонот, што му бил одреден на предлог на Основното јавно обвинителство Скопје, при крајот на април годинава, и е изречен бидејќи тој се гонеше за кривично дело кое налага скратена постапка. За него имаше распишано потерница.
Сега за Југ, надлежното Основно јавно обвинителство Скопје води истрага за кривично дело Неовластено изработување, држење, посредување и тргување со оружје или распрскувачки материи од член 396 од Кривичниот законик, велат од Јавното обвинителство.
Игор Југ е водач на здружението „Владо Черноземски“ од Куманово кое беше дел од патриотскиот фронт. Пред настаните во Собранието, фронтот упати декларација до јавноста дека се против начинот на работата во македонскиот парламент и се заканија со други мерки.
Југ на 27-ми април беше дел од групата која успеа да стаса до собраниската прес- сала каде беше извршен напад врз пратениците на актуелната власт. Во парламентот влегол преку предната врата која ја отворија пратениците Крсто Мукоски и Сашо Василевски, додека голем дел од насилниците со фантомки влегоа од задниот влез во Собранието. Носеше црна маица со симболот на про-усташката организација ХОС, а беше забележан како подолго време ја држи раката на грбот под маицата по што јавноста се прашуваше дали бил вооружен со огнено оружје.