Владата на седница вчера ја задолжи Македонската банка за поддршка на развојот (МБПР) да склучи договор за кредит од 92.242.500 денари со комбинатот „Југохром“ од Јегуновце за изградба на филтерска постројка за заштита од загадување.
Кредитот ќе биде од линија на Посебниот кредитен фонд, а вградувањето на филтрите ќе ја исполни законската обврска беа која фабриката не може да продолжи да работи и да ги ангажира вработените.
Портпаролот на Владата Муамет Хоџа на прес-конференција денеска соопшти дека кредитната линија е со рок на отплата од пет години и грејс-период од една година, а потпишаниот договор меѓу МБПР и „Јегунивце“ ќе биде и јавно објавен.
-Очекуваме конечно да биде решен проблемот со загадувањето, односно изградба на филтри во овој капацитет. Сметаме дека ова позиитивно ќе влијае на заштитата на животната средина, но и од економскиот аспект – овој капацитет да продолжи да работи во иднина кога ќе ги исполни законските услови, рече Хоџа.
Посочи дека компанијата не може да функционира додека не ги исполни критериумите што се бараат со закон и додека не ја добие дозволата од Министерството за животна средина.
Движењето Еко Герила, објавата дека Владата ќе одoбри 1,5 милиони евра за инсталирање филтри на Југохром , ја смета како „следна манипулација со јавноста“.
-Нашите сериозни сомневања се должат на фактот дека инсталацијата на системот за филтрирање порано чинеше 12 милиони евра и беа потребни се најмалку 2 години за нивна инсталација. Југохром е затворен и нетранспарентен за медиумите да покаже што е направено досега. Не е јасно како цената на филтерите се намали од 12 милиони евра на 1,5 -2 милиони евра и поставување на истите ќе се изврши во рок од 4-5 месеци за производство со капацитет од 55%, се вели во соопштението.
Од Еко Герила потсетуваат дека Македонија потпиша и се обврза да ја почитува Архујската конвенција за пристап до информации, учество на граѓаните во одлучувањето и пристап до правда за прашањата поврзани со животната средина, и бараат целиот процес во фази да биде надгледуван од независни експерти.
-Ние не им веруваме на ветувањата на Југохром и на Владата, бидејќи со години нè манипулираа. Ние само бараме почитување на Уставот и законските акти. Како што е познато, во Македонија институциите често се ставаат на законот. Владата не треба да биде вознемирена од надзорот на независните експерти доколку системот за филтрирање, за кој тие тврдат дека ќе го инсталираа, ќе ги задоволи бараните стандарди, велат од Еко Герила.