Брегзит преговорите помеѓу Велика Британија и ЕУ се сериозно заглавени. Според главниот европски преговарач Мишел Барние, петта рунда преговори не дојде до никаков заклучок.
Оттука, лидерите на ЕУ коишто требаше да разговараат на оваа тема идната недела на самит, ќе мораат да ја прескокнат оваа точка на дневниот ред. Според Барние, блокадата на преговорите е предизвикана поради несогласување околу износот на парите што треба да ги плати Велика Британија и поради тоа засега не може да се премине во нова фаза што би била посветена на трговијата.
Претседателот на Европската комисија (ЕК) Жан-Клод Јункер беше далеку поексплицитен во наведување на причината за блокадата. Според него, Британците треба да ги платат финансиските ангажмани преземени во ЕУ пред да може да се премине на нова фаза преговори кои би се занимавале со односите Брисел-Лондон по излезот на земјата од ЕУ.
“Во бар порачувате 28 пива а одеднаш еден од 28 вашите колеги одлучи да си замине. И тој треба да плати”, сликовито објасни шефот на Комисијата.
“Секој ден се откриваат нови проблеми. Затоа процесот ќе биде подолг отколку што мислевме”, рече Јункер.
Тој додаде дека нема осветољубива природа, Европа треба да биде благодарна за се што Британците и дале на Европа за време на војната, по војната и пред војната. “Но сега треба да платат”, рече тој.
Сумата што треба да ја плати Лондон изнесува од 60 до 100 милијарди евра.