Енди Мареј објави крај на сезоната. Како причина во обраќањето до јавноста ја наведе повредата на колкот и најави враќање во Бризбејн во јануари во 2018 година. Британецот е без настап на АТП турот по Вимблдон, а го откажа учеството и на Ју-Ес опен на два дена пред почеток на гренслемот во Њујорк.
„По консултациите со доктори и со мојот стручен штаб ја донесов одлуката што ја сметам како најдобра за мојата иднина. Оваа година беше фрустрирачка на терените од многу причини, но сигурен сум дека по одморот што ќе следува повторно ќе играм тенис на врвно ниво“, напиша моментно вториот светски рекет на својот Фејсбук налог.
Мареј притоа прескокна да каже дали ќе биде подготвен можеби за завршниот Мастерс во Лондон во ноември, но потврди дека сигурно ќе настапи на турнирот во австралискиот град како загревање за првиот гренслем во сезоната. Тоа наведува на заклучок дека светскиот тенис останува и без Британецот до крај на годината што од претходно е случај и со Новак Ѓоковиќ, со Стен Вавринка и со Кеи Нишикори.
Британскиот тенисер веќе го откажа учеството на турнирите во Пекинг и во Шангај во октомври, а во наредните денови се очекува и официјално негово откажување на настап во Виена и во Париз.