Според денешното сведочење на Ана Камчева, сопруга на Орце Камчев, второобвинетата во случајот „Рекет“, Катица Јанева во домот на првообвинетиот Бојан Јовановски-Боки 13 побарала повлекување на гаранцијата од над 14 милиони евра во замена на мерката притвор во куќен притвор.
„Ми рече ако излезе нешто од муабетот, ќе знае дека е од мене, зашто имала апсолутна доверба во Бојан и во Зоран Милески. Рече дека може да отвори и други предмети за мојот сопруг. Се фалеше со нејзината моќ“, рече Камчева.
Поранешната специјална обвинителка го исполнила даденото ветување и предложила замена на мерката притвор со куќен притвор што било прифатено од судијата на претходна постапка. Камчева во сведочењето рече дека не била присутна кога нејзиниот сопруг му дал милион евра на Бојан Јовановски. Рече го информирала сопругот дека ќе го пријави случајот.
Се сретнала и со директорот на Управата за безбедност и контраразузнавање Горан Николовски на кого му навестила дека ќе пријави оти е жртва на рекет.
„Ме праша зошто немам доверба во институциите, му набројав со кого сè е близок, меѓу кои и со министерот за внатрешни работи“, кажа Камчева во сведочењето.
На бизнисменот Орце Камчев, обвинет во случајот „Империја“, му барале осум милиони евра за да го снема предметот, сведочеше денеска неговата сопруга, Ана Камчева, во Основниот суд Скопје, како сведок во случајот „Рекет“, во кој поранешната специјална обвинителка, Катица Јанева е обвинета за изнудување на пари од осомничените.
На последното рочиште, што се одржа на 6 декември, сведочеше Јордан Камчев, кој во повеќе наврати рече дека обвинетиот Боки 13 пробал да го уценува со, според него, наместен предмет „Империја“ покренат од Специјалното јавно обвинителство (СЈО) и на нелегален начин да се стекне со поголема сума пари. Но, бизнисменот притоа откри и други лица и сподели многу информации.
Ден подоцна (7 декември) во јавноста беа споделени нови аудио записи преку Јутјуб за кои Јавното Обвинителство најави истрага.
На првото рочиште за „Рекет“, што се одржа на 3 декември, третообвинетиот Зоран Милевски-Кичеец беше осуден на три години затвор откако призна вина за случајот и предметот за него беше одвоен од оној против Јовановски и Јанева. Милески има право на жалба до Апелацискиот суд само во делот на висината на казната.