Коалицијата за промени и правда, составена од Демократски сојуз, ФРОДЕМ, МОРО- РП и ДЕМОС денеска на прес конференција најави дека листите за пратеници ќе ги објават во среда, на 9 ноември.
Тие денеска испратија и апел до политичките партии на своите листи за кандидати за предвремените парламентарни избори да не ставаат лица кои се осомничени, обвинети или за кои има отворена истражна или предистражна постапка.
– Иако максимално го уважуваме начелото на презумпција на невиност, сепак сметаме дека на ваквите лица не треба да им се дава можност евентуално да се здобијат со пратенички имунитет со што би се оневозможила или би се успорила постапката која се води за нив – велат од Коалицијата.
Јове Кекеновски од ФРОДЕМ на прес конференцијата предупреди дека во Австралија се регистрирани 500 гласачи за претстојните предвремени парламентарни избори, што според него е сомнително, затоа што според информациите кои тој ги поседувал, иселениците од тој дел биле во поодминати години и воопшто не познавале работа со компјутер.
-Постои основано сомнение дека поради малиот интерес за пријавување на гласачи од дијаспората се користат пријавите од претходното пријавување на гласачи од дијаспората. Исто така, сакам да кажам дека и покрај тоа што кампањата се уште не е официјално започната, македонскиот амбасадор наголемо го прави тоа. Втората институција која треба да стои настрана од изборите во дијаспората е Австралиско – македонска црковна епархијата и Нов Зеланд под диригентската палка на надлежниот владика кој прави партиска кампања. Според нашите информации од нашите членови и симпатизери во црквите се пополнуваат апликации за гласање и се убедуваат постарите лица да гласаат за партијата на власт – рече Кекеновски.