Деветмина од вкупно 13 судии кои неодамна поднесоа претставка против претседателот на Основниот суд Скопје 1, Владимир Панчевски денеска се појавија во Републичкиот судски совет каде со членовите и претседателот на Советот, Зоран Караџовски разговараа за проблемот со Панчевски.
Веднаш по состанокот кој траеше над час и половина, Караџовски пред медиумите рече дека средбата поминала конструктивно а на неа разговарале за претставнката како и општо за проблемите во судот.
– Благодарни сме што дојдоа поголемиот број. Тие што не дојдоа биле спречени од објективни причини, не дека не сакале да дојдат. Дискутиравме за повеќе теми, конкретно за известувањето и за состојбите во Основниот суд Скопје 1. Имавме конструктивен дијалог со добра намера од двете страни. Дојдовме од заклучок дека воопшто проблемите не се толку големи, ниту горливи како што се претставени во јавноста, рече Караџовски.
Сп претседателот на Кривичниот суд оствариле одвоена средба, а доколку има потреба ќе биде организирана и заедничка средба меѓу судиите и Панчевски.
Ова како што вели Караџовски, се прави со цел да се зачува угледот на судството, а понатаму оваа тема е во надлежност на Совет за утврдување факти за одговорност на судија.
Тринаесетмината судии од Основниот суд Скопје 1 испратија писмо до Судскиот совет, во кое реагираа и го обвинија Владимир Панчевски дека ја злоупотребувал официјалната интернет-страница на судот со објавување „лични постапувања и ставови за одреден судија“.