„Многу е важно што преговарачката рамка го утврдува македонскиот јазик без никакви дополнителни референци, назнаки и дообјаснувања, унилатералната декларација за јазикот не е дел од преговарачката рамка и тука не смееме и не треба да релативизираме и манипулираме“ рече Фани Каранфилова Пановска на трибината „МК во ЕУ до 2030“ во Куманово.
Таа додаде дека содржината на преговарачката рамка е далеку од совршена, но сѐ што е компромис не може да биде посакуваната опција, тоа е реалноста за жал. Како што кажа Каранфилова Пановска,преговарачката рамка е одраз на асиметријата која постои, бидејќи Македонија не е членка на ЕУ, а Бугарија е и која иако не ни се допаѓа е факт, кој не можеме да го промениме.
„Да имавме можност ние сами да ја пишуваме заедно со државите членки на ЕУ кои се наши поддржувачи без Бугарија, сигурно ќе беше многу подобра, и обратно да имаше можност Бугарија сама да ја пишува без другите држави членки ќе беше многу полоша“ рече Каранфилова Пановска.
Таа додаде дека македонскиот јазик во преговарачката рамка се признава и прифаќа како официјален јазик на кој ќе се преведува европското законодавство и тој ќе биде официјален јазик на ЕУ во моментот на нашето полноправно членство.