Лидерот на Движењето Беса, Билал Касами, по средбата со еврокомесарот Јоханес Хан изјави дека таа се случува „во многу потребно време кога одредени фактори сакаат државата да ја втурнат во меѓуетнички тензии“.
Според Касами, Хан порачал дека политичките лидери имаат огромна одговорност за враќање на земјата кон евроатлантскиот пат, да ги стават интересите на државата пред партиските и дека тие ја подржуваат Македонија за излез од кризата.
Касами потенцираше дека еврокомесарот и тројцата европратеници Едвард Кукан, Иво Вајгл и Кнут Флекенштајн дале поддршка за што поскоро да се состане Собранието, да се избере претседател, а Иванов да го додели мандатот на мнозинството од 67 пратеници за да се започне што поскоро со реформите предвидени според Пржинските договори.
Во меѓувреме, Хан тој постојано објавува пораки на Твитер.
– Патот за Скопје кон ЕУ е отворен по последниот состанок на Советот на ЕУ. Но часовникот отчукува. Потребно е лидерство наместо тактика. Економијата трпи, напиша тој на Твитер, а пораката е проследена и со фотографија на државното знаме на Македонија и знамето на ЕУ.