Адвокатот Еленко Миланов во своите завршни зборови во случајот „Талир 2“ , а во врска со изградбата на партиското седиште на ВМРО-ДПМНЕ во центарот на Скопје денеска пред судот рече дека обвинителството не прикажало докази дека Никола Груевски кој е првообвинет му наложил на тогашниот генерален секретар Кирил Божиновски да потпише договор со инвеститотор. Според Миланов, таквата одлука била резултат на заседавање на партиските тела.
– Нема доказ дека Кирил Божиновски постапувал по барање на првообвиниетиот, туку имало одлуки на сите партиски тела кои го задолжиле да го потпише договорот, рече Миланов.
Миланов забележа дека обвинителот користел прислушувани разговори како докази со кои сакал да го убеди судот дека договорот за соинвеститорство бил нарачан, претходно договорен и се знаел изведувачот кој требало да го гради објектот во кој денеска е сместено партиското седиште на ВМРО-ДПМНЕ.
Тој реагираше и на времето во кое е поднесено обвинението за „Талир 2“, а кое излегува од рамките на мандатот на поранешното СЈО.
– Обвинителниот акт е поднесен од неовластен тужител. По 30.6.2018 година, Специјалното јавно обвинителство нема надлежност за постапување. Ова обвинение од 22.11.2018 е од неовластен тужител и судот тоа мора да го почитува, рече адвокатот Миланов во врска со датумот ( 22 ноември 2018 година) во кој е поднесено обвинението за „Талир“ во време на поранешното СЈО, а на кое стои потпис на поранешната обвинителка Катица Јанева, а мандатот на СЈО за поднесување обвиненија и за прибавување докази е 18 месеци.
Кога СЈО во ноември пред четири години го поднесе обвинението објасни дека ја раздвоило постапката во предметот „Талир“. Едниот обвинителен акт се однесуваше на незаконско финансирање на ВМРО-ДПМНЕ, а вториот обвинителен акт се однесува на незаконската изградба на седиштето на партијата „Талир 2“.
С.М.