Заменик министерот за надворешни работи на Грција, Јоргос Катругалос, во изјава за грчко радио „Њуз247“ рече дека решението за деценискиот спор за името е „блиску“.

„Се наоѓаме многу блиску до решение, а 100-те метри од патот, за кои говореше премиерот во Софија, сега станаа 50 метри. Но, треба да имаме на ум дека се уште немаме договор“ рече Катругалос.

Тој исто така кажа дека тежината за постигнување договор е кај другата страна.

„Потребна е смела одлука од страна на премиерот Заев за двете прашања за кои имаме дискутирано, за уставни измени во врска со името и прифаќање на ерга омнес решение, за да се реши проблемот“ рече Катругалос .

Сето ова, според него, е пакет и токму затоа ништо не е договорено, сѐ додека не се договори сѐ.

Тој не очекува  десничарскиот коалициски партнер на владата, Независни Грци, да го блокираат договорот.

Ако се постигне договор, тоа ќе биде толку позитивно, што би ме изненадило ако некоја партија има приговори“, посочува Катругалос.