Ќе почнат ли вработените во СЈО конечно да добиваат плати по неколку месечниот застој што настана поради тоа што по разрешувањето на Катица Јанева нема кој да потпише за распределба на средствата? – Пари на сметката на СЈО има, но џабе кога нема потпис.

Со измените на Законот за јавнообвинителска служба, чии предлагачи се пратениците од мнозинството, треба да се реши проблемот со тоа што се предвидува републичкиот Јавен обвинител Љубомир Јовевски да биде задолжен за сите платни налози се до 15 септември следната година, кога и официјално СЈО прекинува да постои. Мандатот на Јанева истече на 15 септември годинава.

Воедно, се предлага Јовески да има надлежност и врз истражителите кои своевремено СЈО ги позајми од МВР и од Финансовата полиција, а во иднина ќе работат и на случаи кои ќе ги отвори ОЈО. Наводно, овие измени биле подготвени многу бргу по разрешувањето на поранешната специјална обвинителка Катица Јанева, но биле „забавени“ заради случувањата што постојано излегуваа во јавноста околу СЈО.

Фото: occrp.org

Во предлог законот е наведено дека сите порано вработени во Основното јавно обвинителство да се вратат на своите стари работни места, а за останатите ќе се направи систематизација.

„За сите прашања кои се однесуваат на работниот однос на јавнообвинителските службеници и лицата вработени во Јавното обвинителство за гонење на кривични дела поврзани и кои произлегуваат од содржината на неовластено следење на комуникациите кои вршат технички и помошни работи одлучува Јавниот обвинител за гонење на кривични дела поврзани и кои произлегуваат од содржината на неовластено следење на комуникациите или Јавниот обвинител на Република Северна Македонија доколку нема избрано Јавен обвинител за гонење на кривични дела поврзани и кои произлегуваат од содржината на неовластено следење на комуникациите“, стои во предлог-законот.

Околу 80 вработени во Специјалното јавно обвинителство и натаму чекаат три неисплатени плати. Телефоните се исклучени, а нема ниту интернет. Вработените кои секојдневно одат на работа, алармираат дека освен платата што ја немаат земено, за институцијата не се платени ниту сметки за струја, ниту за кирија и сè поизвесно е дека зградата во која „бомбите“ требаше да бидат на безбедно, ќе остане без струја.