Епидемиолозите не се единствени кои наидуваат на проблеми на терен при правењето на епидемиолошките анкети. Во спречување при извршување на обврските попладнево наидоа и инспектори на Државниот пазарен инспекторат (ДПИ) кои, како што објави порталот „а1он.мк“, два и пол часа останале пред ресторанот „Винотека“ на Боемска улица во Дебар маало. Во тоа, се вели во веста на порталот, ги оневозможиле келнерите, а причина за „непристапноста“ во внатрешноста на локалот бил политичар меѓу гостите.

Случката ја потврди и раскажа и Мери Продановска, инспекторка во ДПИ, која истакна дека во прашање бил лидер на политичка партија. Таа вели дека за првпат се соочуваат со таков отпор при спроведување на теренските активности, а „а1он.мк“ пишува дека во „Винотека“ во моментот бил лидерот на ВМРО-ДПМНЕ, Христијан Мицкоски.

„Низ целата „Боемска улица“ проверувавме дали и во внатрешноста на кафеаните се врши некаква активност. Колегите беа спречени во вршење на надзор во еден од објектите, со образложение дека не работи, нема клуч и внатре не се случува ништо. Но, тие останаа пред објектот и по два и пол часа забележаа како две лица излегуваат од него, а некој препозна политичар. По нив уште две лица го напуштија објектот, меѓутоа нив ниту ги препознавме, ниту можевме да ги легитимитаме. Конечно влеговме во внатрешноста, беше празен, но забележливи беа елементи како храна во кујната, чинии, отпадоци, шишиња кои упатуваа дека внатре се вршела дејност“, изјави Продановска за „а1он.мк“.

Од Инспекторатот најавија постапка за спречување на инспекциски надзор и вршење на дело спротивно на протоколите што претставува кривично дело. Пред објект во Дебар маало бил забележан и Ристо Ставревски, началник на СВР Скопје, кој бил во придружба на полициска екипа.