Кит Келог, кој треба да се повлече од таа функција во јануари, изјави на Националниот форум за одбрана на Реган дека напорите за решавање на конфликтот влегле во „последните 10 метри“, што, како што забележа тој, е секогаш најтешкиот дел.
Пратеникот на американскиот претседател Доналд Трамп за Украина Кит Келог изјави дека договорот за завршување на војната во Украина е „навистина блиску“ и дека сега зависи од решавањето на две главни отворени прашања – иднината на украинскиот регион Донбас и нуклеарната централа Запорожје.
Келог, кој треба да се повлече од таа функција во јануари, изјави на Националниот форум за одбрана на Реган дека напорите за решавање на конфликтот влегле во „последните 10 метри“, што, како што забележа тој, е секогаш најтешкиот дел.
–Ако ги решиме овие две прашања, мислам дека останатите работи ќе бидат решени доста добро. Речиси сме таму. Навистина, навистина сме блиску, рече Келог.
Според првичните американски предлози, нуклеарната централа Запорожје, чии реактори моментално се затворени и работат на ладно, би била рестартирана под надзор на Меѓународната агенција за атомска енергија (МААЕ), а генерираната електрична енергија би била подеднакво распределена меѓу Русија и Украина.
Русија започна голема инвазија на Украина во февруари 2022 година по осум години борби меѓу сепаратистите поддржани од Русија и украинските трупи во Донбас, кој ги опфаќа регионите Донецк и Луганск.