Лидерот на Северна Кореја Ким Јонг ун престојувал во посета на Кина од неделата до денес, што е прва посета во странство од 2011 година кога тој дојде на власт, потврдија кинеските медиуми, кои објавија дека Ким се сретнал со кинескиот претседател Си Џинпинг.
На состанокот, како што се објавува, изразена била подготвеност на претстојниот состанок со американскиот претседател Доналд Трамп да се заложи за денуклеаризација на Корејскиот полуостров.
Ким, кој во Кина е дочекан со голема помпа, изјавил дека е подготвен за денуклеаризација во согласност со волјата на бившите севернокорејски лидери, објави агенцијата Ксинхуа.
Кинеските медиуми пренесоа видео материјали на Ким и Си, кој приредил прием за лидерот на Северна Кореја и за неговата сопруга. Ким изјавил дека посетата на Кина била негова задача.
Кинескиот претседател прифатил да го посети Пјонгјанг.
Посетата на Ким на Кина претставува враќање на кинеската дипломатија во прв план во решавае на нуклеарното прашање на Северна Кореја, која спроведе неколку нукеларни и балистички проби, поради што и се воведени меѓународни санкции.
Засега не се знае кога би се одржала најавената средба на Ким и Трамп, освен претходните најави дека тоа би требало да се случи до крајот на мај.
Ким од доаѓањето на власт во 2011 година не бил во посета во странство. Јапонските медиуми први ја пренесоа веста за можната посета на Кина.
Агенцијата Кјодо во вторникот објави дека специјалниот севернокорејски воз кој личи на оној што го користел Ким Јонг Ил за патувања во странство, се наоѓа на на железничката станица во Пекинг и дека на самото место се наоѓа невообичаен број на припадници на кинеските безбедносни сили.
Белата куќа соопшти дека кинеската Влада го контактирала Вашингтон за да ги извести американските претставници за посетата на севернокорејскиот лидер Ким Јонг-ун на Пекинг.
– Брифингот вклучуваше и лична порака на претседателот Си до претседателот Трамп, изјави портпаролката на Белата куќа, Сара Сандерс.
Но, таа не наведе детали од пораката.
– САД се во контакт со Јужна Кореја и со Јапонија и најновиот развој на настани се набљудува како уште еден доказ дека нашата кампања за максимален пристисок создава соодветна клима за дијалог со Северна Кореја, посочи Сандерс.