Откако се состанаа пред Специјалното јавно обвинителство каде што искажаа поддршка за институцијата, демонстрантите се преместија и во моментов се пред Собранието на Република Македонија. Се скандира „Нема правда нема мир“, „Оставка“ и се слушаат свирежи, јавува репортерката на НОВА од терен, Кристина Озимец.
Движејќи се кон Собранието демонстрантите фрлија неколку бои и врз фасадата на Министерството за правда.
Запечатен е влезот кон седиштето на ВМРО-ДПМНЕ кај хотелот ТЦЦ Плаза, а полиција има освен кај Правда и во дворот на Собранието.
*Започнаа протестите, поддршка пред седиштето на СЈО за нивната работа
*Протести: Министерството за правда обоено во неколку бои
– Ние, граѓанките и граѓаните кои во борбата за правда и демократија, здружени протестираме низ улиците на Македонија во име на слободата, правдата и еднаквоста, нагласуваме дека преговори во овие услови се неприфатливи. Затоа, одлучно продолжуваме со протести и бараме: Итно повлекување на одлуката за аболиција на сите оние против кои се води истрага и против кои е покренато обвинение од страна на Специјалното јавно обвинителство (СЈО); Итна и неотповиклива оставка на Ѓорге Иванов од функцијата Претседател на Република Македонија; Произнесување на Уставниот суд за уставноста на СЈО; Формирање на специјално одделение на Кривичниот суд, кое ќе биде надлежно за случаите под јурисдикција на СЈО; Итно повлекување на одлуката за одржување на парламентарни избори на 5 јуни; Задолжително вклучување и присуство на независни претставници на граѓанското општество во процесот на решавање на кризата; Формирање на преодна влада која докрај ќе ги имплементира итните реформски приоритети од извештајот на Прибе. Дотогаш, нашата политичка борба останува на улиците. Нема правда, нема мир!
#Протестирам #Protestoj, порачуваат организаторите на овие демонстрации.
