Комисијата за мандатно имунитетни прашања со мнозинство гласови му препорача на Собранието да му го одземе мандатот на пратеникот Никола Груевски, врз основа на добиено известување од судот дека пратеникот е осуден на две годни затвор. „За“ гласаа пет члена на Комисијата од парламентарното мнозинство.
Пратениците на ВМРО ДПМНЕ ја напуштија Комисијата. Пратеникот Трајко Вељаноски рече дека се работи за монтиран политички процес.
-Денеска се врши политички прогон. Не е докажана штетата по државата ниту материјална корист. Во тоа возило денес се возат меѓународни и домашни гости, рече Вељаноски.
Александар Кирацовски од СДСМ ги демантираше тврдењата на Вељаноски и рече дека „правда мора да има за сите затоа што никој не е над законите“.
Пратениците од власта кажаа дека мандатот треба да му се одземе затоа што Груевски е осуден за злоупотреба на власт, што го прави недостоен да биде пратеник. Овој случај треба да биде пример за сите функционери, рече Павле Богоевски претседател на Комисијата за мандатно имунитени прашања.
Пратениците од независната пратеничка група се изјаснија дека ќе гласаат против. Сашо Василевски рече дека во време кога се зборува за помирување на левицата и десницата, ваквиот предлог е преуранет и тие се против.
За да му се одземе мандатот на Груевски треба да гласаат 80 пратеници што парламентарното мнозинство во овој мемент ги нема.
Дури и мандатот на Груевски не му биде одземен и тој остане пратеник, тоа не го спречува издржувањето на казната затвор.
Груевски беше поканет на седницата на Комисијата, но тој не дојде.
Жалбата е последната можност за одложување
Од адвокатскиот тим на Груевски за НОВА потврдија дека завчера попладне доставиле жалба до Кривичниот совет откако претходно беше одбиена молбата со која бараа да се одложи издржувањето на казната затвор.
Со ова, тие го искористија законскиот рок од три дена што го имаа да се жалат до Кривичниот совет.
Решението на судијата дека му се одбива молбата беше доставено до адвокатите во петокот, кога беше и донесено, и од тогаш течеше тридневниот рок за жалба.
За жалбата до Кривичен Никола Груевски лично се обратил до претседателот на Собранието Талат Џафери од кого побарал потврда дека тој е член на собраниската Комисија за уставни прашања. Спикерот Џафери денеска рече дека одговорил на барањето на Груевски и до пратеникот, како што велат собраниски извори, била испратена фотокопија од „Службен весник“ дека е член на таа собраниска комисија, со потпис од претседателот на Собранието.
Адвокатите на Груевски бараат извршувањето на казната затвор да се одложи поради неодложни пратенички обврски на Груевски во Собранието каде утре ќе започне расправата по нацрт амандманите во уставната комисија. Истите причини беа наведени и кога адвокатите поднесоа молба до судија за извршување санкции, а која беше одбиена со образложениедека „Собранието одлучува со мнозинство пратеници“ и дека присуството на Груевски не е неопходно.
Кривичниот совет сега има рок од три дена да одговори на жалбата на Груевски. Овој рок почнува да тече во моментот кога жалбата ќе стигне во Кривичниот совет. Од адвокатскиот тим на Груевски велат дека жалбата била испратена преку пошта. Во судот се очекува да стигне најдоцна денеска.
Според упатниот акт, Груевски треба до 8 ноември (четврток) да се јави во истражниот затвор Шутка на издржување на казната. За вечерва преку социјалните мрежи е најавен протест за поддршка на Груевски пред Кривичниот суд со почеток во 19 часот.
Поранешниот премиер Груевски беше прогласен за виновен и осуден на двегодишна затворска казна на 23 мај. Тој заедно со првообвинетиот во „Тенк“ Ѓоко Поповски поднесоа жалба до Апелацискиот суд Скопје, кој ја одби како неоснована жалбата на Груевски, а делумно ја прифати жалбата на Поповски и му ја намали казната затвор на четири години и шест месеци. Во предметот „Тенк“ осудена е и поранешната министерка за внатрешни работи Гордана Јанкулоска на шест години затвор.