Трајко Вељаноски го задржува пратеничкиот имунитет и останува на слобода во истрагата на Јавното Обвинителство за нарачателите на насилниот упад во Собранието на 27 април во 2017 година. Комисијата за деловнички и мандатно-имунитетни прашања пред малку ја затвори дводневната расправа за поранешниот претседател на Парламентот и со нерешено гласање (4:4) ја пролонгира неизвесноста во неговиот случај.
Ремито не значи ниту одбивање на барањето за притвор ниту негово прифаќање, истакна претседателот на собраниската комисија, Павле Богоевски и дополни дека случајот ќе биде проследен до пратениците на пленарна седница.
Нерешениот резултат во гласањето е последица на отсуството на Агим Шаќири од владејачкото мнозинство поради здравствени причини.
Барањето за притвор на Трајко Велјаноски дојде од судија на претходна постапка од Кривичниот суд поради сомнение за организирање на настаните во Собранието на 27 април во 2017 година за што се обвинети и екс министрите Миле Jaнакиески и Спиро Ристовски, екс директорот на УБК, Владимир Атанасовски, разузнувачот Никола Бошкоски и поранешниот премиер, Никола Груевски.
Расправата за одземање на пратеничкиот имунитет на Вељаноски во изминатите два дена мина во жестока дебата меѓу пратениците од опозицијата и на парламентарното мнозинство. Со реплики, контрареплики и паузи, пратениците се расправаа околу оправданоста да му се одземе пратеничкиот имунитет на Вељаноски. Пратениците од опозицијата оценија дека се работи за политички прогон и предложија колективно на сите да им биде одземен пратеничкиот имунитет додека парламентарното мнозинство беше со став дека треба да се откријат организаторите на 27 април и да бидат изнесени пред лицето на правдата.