Комитетот за заштита на правата смета дека дека судството и судиите во Македонија се обични извршители на нарачки кои работат по двојни стандарди.

– Во случаите кога кривичната постапка е иницирана од Јавното обвинителство, кое што е под директна контрола на режимот, беспоговорно се определува мерка притвор на секое барање. Во моментов се притворени околу 400 лица, при што најголемиот дел од доделените притвори се противзаконски. Имаме случаи на тригодишни притвори.

Има огромен број одбиени притворски жалби и барања за определување, односно замена на притворот со домашен притвор, а беа предлагани  огромни суми на пари, хипотеки и имоти како гаранции. Во некои случаи се изречени првостепените казни од 3 до 4 години затвор, а луѓето коишто се уште се во притвор веќе имаат одлежано по 30 месеци притвор, се наведува во соопштението.

Во случаите иницирани од страна на Специјалното јавно обвинителство судиите воопшто не определуваат мерка притвор, иако е сосема јасно и сите знаат огромни се можностите за влијание врз сведоците и дека се вршат огромни притисоци врз потенцијални сведоци, сметаат од Комитетот.

– Станува збор за случаи во кои висините на казните што им се закануваат се високи и кои се поткрепени со огромен број на докази. Со ваквото постапување се врши класична опструкција и саботирање на работата на Специјалното јавно обвинителство.

Фактите покажуваат дека се притвораат луѓе без докази и дека се држат во притвор неосновано. Затворите се полни со луѓе осудени без докази, а постапките во кои се осудени се со огромен број на незаконски суштински и процесуални повреди, се наведува во соопштението.