Македонија е чекалница за место во квалификациите за Светското кошаркарско првенство во 2019 година. Естонија и во Талин ги совлада „црвено-жолтите“ со 74:65 и ги остави во неизвесност за конечниот изглед на табелата во преквалификациската група Ц, а со тоа и нивната иднина во мундијалскиот циклус.
Естонците со денешната победа се најавија во главната фаза на патот кон Кина. Но, пред нив е гостување и на Косово што е без резултатско значење, но исходот во сабота во Приштина е пресуден за тимот на Јорданчо Давитков. Со триумф на кошаркарите од Балтикот, Македонија ќе заврши на второто место што ќе значи минување на претквалификациите. Во спротивно, Косовците ќе одат натаму.
Македонија имаше прилика да не зависи од други. Беше рамноправен партнер на Естонците на теренот во три четвртини (16:18, 25:23, 13:14) и десет минути ја делеа од заверка на второто место во групата. Но, завршните десет минути донесоа голем пад во играта што го искористија домашните и со 20:10 ги разрешија сите дилеми околу победникот. Притоа си обезбедија и армија навивачи пред дуелот со Косово.
Џордан Теодор со 19 поени и капитенот Војдан Стојановски со 18 беа најефикасни во македонската селекција. Сите останати не успеаја да ја минат двоцифрената граница на кошеви. Сок со 15, Талтс со 14, Веидеман со 13 и Кангур со 11 ја предводеа Естонија до третата победа во претквалификациите.
Естонија – Македонија 74:65
По четвртини: 16:18, 25:23, 13:14, 20:10. Спортска сала: „Саку Сурхол“ во Талин. Гледачи: 2.500. Судии: Томас Јасевичиус (Литванија), Јурис Кокаинис (Летонија), Мануел Мацони (Италија).
Естонија: Веидеман 13, Лане, Пуидет 2, Сок 15, Талтс 14, Кедус 5, Хермет, Кангур 11, Ајхфус, Јоесар, Пасоја 8, Халик 6. Селектор: Тит Сок.
Македонија: Николовски 2, Стаиќ, Јанески, Мекиќ, Костоски 6, В. Стојановски 18, Тасовски 7, Ѓуроски 2, Брчков, Чековски 10, Теодор 19, Младеновски 1. Селектор: Јорданчо Давитков.