Кошаркарите на МЗТ Скопје, конечно, обезбедија причина за радост и задоволство. За себе, за управата, за навивачите. Аеродромци го совладаа Работнички со 76:67 (по четвртини: 17:14, 16:17, 21:17, 22:19) во финалето на Купот на Македонија за деветта титула во натпреварувањето колку што има и тимот од Градски парк.

Димитар Мираковски беше најефикасен поединец со 24 поени, шест повеќе од првиот стрелец во победничката екипа, Бојан Трајковски додека неговиот клупски колега Дамјан Стојановски го понесе признанието за МВП на финалето.

Лукаиќ: Заслужена победа по тешката полусезона во АБА лига

Жељко Лукаиќ, тренер на МЗТ Скопје Аеродром, ја оцени пресметката во салата „Јасмин“ во Кавадарци како достојна на финале, а резултатскиот успех очекува да биде во насока на враќање на самодовербата кај неговите кошаркари за првенствените предизвици што ќе следуваат. „Металците“ зад себе имаат очајна сезона во регионалната АБА лига на што кумуваа и големиот број на повреди со кои се соочи српскиот стручњак по преземање на кормилото на екипата од „Јане Сандански“.

„Некои наши идеи не успеавме да наметнеме, но успеавме да одговориме на сите можни начини. Ги чекавме нашите пет минути и ги дочекавме и одигравме најдобро кога ни беше и најпотребно. Она што прави да бидам задоволен е колективната игра. Имавме тешка полусезона во АБА лигата, повредите во голема мера ги отежнуваа нашите настапи, но мислам дека овојпат заслужено се радуваме. Едноставно мора да го искористиме моментот за враќање на самодовербата. Беше неопходно да заличиме како екипа за што мина многу време“, истакна Лукаиќ по првиот негов трофеј на македонската кошаркарска сцена.

Тој воедно ја потенцира важноста за присуство на израмнети клубови на кошаркарската сцена во Македонија, но и предупреди дека победа во Куп финалето не смее на опие, пред се, поради обврските што аеродромци ги чекаат во домашниот шампионат.

„Голем играч се станува во вакви мечеви, а ваквите мечеви на површина исфрлаат херои.  Ваквите дерби средби се мотив за уште посилна работа, но и за развој на млади кошаркари“, додаде Лукаиќ.

Докузовски: „Вечното дерби“ е повторно живо, честитки за МЗТ Скопје

Тренерот на Работнички, Марин Докузовски го призна поразот во финалето во Купот меѓутоа го нотира и значењето од оживување на пресметките меѓу „вечните“ во македонската кошарка. Поранешниот селектор на „црвено-жолтите“ упати честитки до противничкиот табор за победата, а како причини за поразот на неговата екипа ги наведе отсуството на повредениот Маркус Гињар и личните грешки на високите кошаркари поради што Крстевски и Николовски мораа предвреме да завршат со настап.

„Финалето беше вистински празник на кошарката. Понудивме одличен, борбен меч како најава за враќање на кошаркарското дерби на Македонија. Честитки до МЗТ Скопје за освоената титула“, рече Докузовски.

Работнички на патот до финале ги елиминира Карпош во четврт-финалето со убедливи 103:49, а потоа и Куманово во полуфиналето со 77:68. Во мечот за титулата остана без арсенал за десетта титула. Отсуството на Гињар и без поддршка до крај од високите играчи во рекетот доведе до епилог каков што беше конечниот во Кавадарци иако за тоа се прашуваа и аеродромци.

„Личните грешки можеби пресудија.  Фактот што моравме да играме без Николовски и Крстевски  дефинитивно беше решавачки за победникот. Да не зборам за Гињар со кого ќе беше друга песна. Бевме лимитирани на клупата и постојано бевме во состојба да бркаме резултат на терен. Примивме неколку несреќни поени додека во напад промашивме неколку клучни шутеви за погодоци“, анализира Докузовски.

Куп на Македонија – сезона 2017/18

Финале

Работнички – МЗТ Скопје 67:76

Полуфинале

Работнички – Куманово 77:68

Блокотехна – МЗТ Скопје 78:89

Четврт-финале

Работнички – Карпош 103:49

Куманово – Гостивар 85:65

Блокотехна – Охрид 110:88

МЗТ Скопје – Фени Индустри 115:68