Косовскиот премиер Рамуш Харадинај го повлече барањето на Косово за членство во Интерпол годинава, откако не успеала да обезбеди доволно голема поддршка од постоечките членови.
Тој додаде дека иако многу земји изразиле поддршка за членство на Косово, тоа „не биле доволен број членки“ за Косово да влезе во меѓународната полициска организација.
Првиот заменик на косовскиот премиер и министер за надворешни работи Беџет Паџоли изјави претходно дека Косово обезбедило доволно гласови за членство во УНЕСКО, но дека околу прашањето на Интерпол Приштина ќе изврши „тактичко повлекување во договор со САД“.
-Членството во Интерпол бара многу работа и голем ангажман. Во моментов кога дојдов, видов дека се работело на тоа, но не како што треба. Многу сум скептичен и воопшто не сум храбар да кажам дека се ќе оди како што треба бидејќи домаќинот на овој самит Кина постави барикади, рече Пацоли.
Како пример тој истакна дека на косовските претставници, кои треба да учествуваат на собранието, се уште, како што кажа, не им биле испратени визи.
-Голема одговорност е да кажеме дека се повлекуваме. Уверен сум дека луѓето ќе разберат, но мора да направиме тактичко повлекување во соработка со САД и да се подготвиме за следниот самит догодина, кој ќе се одржи во Абу Даби“, кажа Пацоли уверен дека дотогаш Приштина ќе обезбеди доволен број гласови.
За членство на Косово во Интерпол потребно е Приштина да обезбеди 115 гласови.