Министерката за култура Бисера Костадиновска-Стојчевска во своја објава на Фејсбук напиша дека корените на македонската култура во Европа се напојуваат со делото на Светите браќа Кирил и Методиј, кои беа прифатени како покровители на најстариот континент.
„Се напојуваат од Охридската книжевна школа на Св. Климент Охридски и со првите пројави на европското ренесансно сликарство со фреските во манастирите во Нерези, Курбиново и Охрид. Теракотните икони од Виничко Кале претставуваат единствени од ваков тип со непроценливо богатство од археолошка, уметничка и теолошка вредност се постојан интерес на европските музеи. Во европската култура која е изградена на највисоките стандарди на мултикултурализам, интегративен пристап, дијалог, толеранција, почитување и заштита на сите различни култури, се испреплетени делата на нашите културни дејци од мугрите на создавањето на нашата држава“, посочи Костадиновска-Стојчевска.
Таа додаде дека Европа им се восхитува на Конески, на Шопов, на Горан Стефановски чии драми се поставени на многубројни театарски сцени во Европа. Плејада наши современи автори се дел од книжевното европско небо.
„Сите тие и многумина други се дел од нашето творештво со чија помош го добивме изборот на Скопје за престолнина на културата во Европа за 2028 година. Тогаш под европското и македонското знаме ќе ја подигнеме креативната енергија за да ја рашириме и низ целиот континент. Ги отвораме ширум портите за да ја прегрнеме културата на Европа, како што Европа ја прегрна нашата, за да ја збогатуваме колоритноста на идентитетската карта на Европа со македонската култура, со македонскиот јазик“, истакна министерката.
Таа заклучи дека со тие европски вредности создаваме заеднички културен простор во кој сите се добредојдени.