Да се преиспита известувањето на ТВНова од церемонијата во Ватикан при прогласувањето на Мајка Тереза за светица, бара Љубомир Костовски, член на привремената комисија за мониторинг на медиумите.
Тој денеска ќе побара стручните служби во Агенцијата за медиуми да ги документираат овие настани, за да може потоа комисијата да постапува.
„Проблематично беше што делегацијата иако ја водеше претседателот на државата, на ТВ Нова од него изјава немаше, но затоа во ударните вести се пренесуваше изјава од лидерот на ВМРО-ДПМНЕ Никола Груевски која траеше по половина час. Од другите претставници во делегацијата по една реченица, од опозицијата ниту една. Се добиваше впечаток дека Груевски е всушност премиер, што воопшто не е така. Ова е групо кршење на принципот на еднаквост и како и пример за мешање на државата и партијата на власт од највисок вид“, вели Костовски.
Откако беше вратена старата методологија за мониторинг, комисијата ќе може да изрекува санкции после секој направен прекршок и нема да се чека да се направат поголем број на грешки, како што предвидуваше новата методологија.
Одлуките ќе се носат со мнозинство гласови од вкупниот број на членови.
Ад хок комисијата ќе ја мониторира работата на телевизиите и радијата се додека Државната изборна комисија не ги соопшти официјалните резултати од изборите.
За првото прекршување на законската регулатива на медиумот ќе му биде изречена опомена, а за секој следен прекршок парична казна. Комисијата нема право да бара да се затвори некој медиуми, ниту да санкционира новинар за искажан коментар.Највисоката казна со која може да се соочи медиумот е 4.000 евра.
Мониторингот на медиумите за изборите на 11 декември почна во петокот, а првиот извештај ќе треба да биде готов во петок.