Премиерот Димитар Ковачевски денеска во Рим се сретна со претседателот на Советот на министри на Италија, премиерот Марио Драги.
На средбата со италијанскиот премиер, на која присуствуваа и министерот за надворешни работи Бујар Османи, министерот за внатрешни работи Оливер Спасовски и министерката за култура Бисера Костадиновска-Стојчевска, беше потенцирано дека Северна Македонија и Италија негуваат исклучително блиски политички и економски односи, соопшти владината прес-служба.
Премиерот Ковачевски го поканил италијанскиот колега, премиерот Марио Драги, да ја посети Северна Македонија.
Македонскиот премиер на средбата со Драги ја потенцирал улогата на Италија како гласен промотор на проширувањето на ЕУ со земјите на Западен Балкан, што беше потврдено и со Резолуцијата на италијанскиот Парламент минатата година во која беше нагласена европската перспектива на регионот и беше испратен повик за итно одржување на првите меѓувладини конференција за Македонија и Албанија.
Премиерите Ковачевски и Драги изразија согласност дека проширувањето на ЕУ треба да се разгледува од геополитички аспект, како безбедносно прашање клучно за стабилноста и просперитетот на нашиот регион и на Европа. Беше потенцирано дека ЕУ треба да го препознае моментот и да го има предвид и фактот дека Северна Македонија ја осуди војната во Украина и целосно ја усогласи својата со надворешната политика на ЕУ, како вистински и кредибилни партнери, споделувајќи ги истите вредности на слободен и демократски свет.
Италија е меѓу 10-те топ рангирани земји со кои Северна Македонија има најголем обем на билатерална трговија и дека од посебна важност за унапредување на економските односи е Коридорот 8 со кој преку пристаништата на Албанија ќе се овозможи директен пристап до италијанскиот пазар.